Массо а дешаран хьукматашкахь д1ахьош бу Нохчийн меттан шарна лерина беркате болх. Иштта и хиларан тамаша а бац: вайн къомо дукха сатийсина, нохчийн меттан хьакъболу толам бу и–1едалан т1ег1анехь иштта лекха меттан сий айбар. Дела реза хуьлда вайн Мехк-Дена, Россин Турпалхочунна Кадыров Ахьмад-Хьаьжин Рамзанна, оццул лерина тидам беш, шен а, вайн массери а ненан меттан дола дарна! Нохчийн меттан шарна лерина, республикехь бечу хьаналчу балхана т1аьхьаюьсуш йац С. С-А. Джунаидовн ц1арах йолу Гуьмсера хьехархойн колледж а. Тахана, чиллин беттан пхийтталг1ачу дийнахь, хьукматехь хилира рог1ера йиллина мероприйати «Ненан мотт соьца мел беха, онда бу сан лаьттахь орам!» ц1е а йолуш. Урок-викторина кечйинера нохчийн меттан къоначу хьехархочо Исламова Жанната. Студенташа, шина тобане бекъа а белла, гайтира шайн хаарш. Уьш дара, нохчийн маттах, литературах, къоман г1иллакхех лаьцна. Викторинехь дакъалоцуш бара 9-1 курсан студенташ. Къовсаман тидам беш бара хьехархой-маххадорхой, шайн коьртехь Дааев Бухарин Вахахьаьжа а волуш. Бинчу белхан жам1 дина, толамхой билгалбехира. Шина а тобанна грамоташца совг1аташ дира. Гулбеллачара билгалдаьккхира, нохчийн мотт бийцарехь, хьехорехь иэшнарг хуьлуш цахилар, толам нохчийн меттан хилар, и вайн къоман са а, синкхача а, дозалла а хилар. Иштта цхьаьнакхетарш шеран дохалла кхин а маса а д1адахьа дезаш хилар а ч1аг1дира цигахь. Дала т1аьхье беркате йойла!